ကြွက်သားတွေကို အနားမပေးဘဲ လေ့ကျင့်ခန်းအတင်းလုပ်တဲ့အခါ
လေ့ကျင့်ခန်းလုပ်တဲ့သူတော်တော်များများမှာ မေ့နေတတ်တဲ့အချက်က လေ့ကျင့်ခန်းလုပ်ပြီး ကြွက်သားတွေကို အနားမပေးကြတာပါပဲ။ ဘာကြောင့် ကြွက်သားတွေကို သေချာအနားပေးဖို့ လိုအပ်တာလဲဆိုတော့
- လေ့ကျင့်ခန်းလုပ်နေတဲ့အချိန်မှာ ကြွက်သားတွေ ကြီးထွားတာမဟုတ်ပါဘူး။
- လေ့ကျင့်ခန်းလုပ်တဲ့အချိန် ကြွက်သားမျှင်တွေက ဆုတ်ပြဲသွားပြီး နောက်ထပ်ကြွက်သားအသစ်တွေ ဖြစ်လာဖို့ သေချာအနားပေးရပါတယ်။
- ကိုယ်က အနားယူနေတဲ့အချိန်မှာ ခန္ဓာကိုယ်က ဆုတ်ပြဲနေတဲ့ကြွက်သားမျှင်တွေကို အသစ်ပြန်အစားထိုးပေးဖို့ လုပ်ဆောင်ရပါတယ်။
- ကြွက်သားမျှင်အသစ်တွေ အစားထိုး ပြန်မဖြစ်လာတဲ့အခါ ကိုယ့်ရဲ့ လေ့ကျင့်ခန်းလုပ်တဲ့ အရှိန်ကို ကျဆင်းစေပါတယ်။
ကြွက်သားတွေကို အနားပေးတယ်ဆိုတာ ဘယ်လိုမျိုးလဲ။
၁။ အဓိကအရေးအကြီးဆုံးကတော့ အိပ်ချိန်ပါပဲ။ လူတစ်ယောက်အိပ်နေတဲ့အချိန်မှာ ခန္ဓာကိုယ်တွင်းမှာ ပျက်စီးသွားတဲ့ ဆဲလ်အဟောင်းတွေကို ဖြိုခွဲပြီး ဆဲလ်အသစ်တွေ ပြန်ဖြစ်လာဖို့ ပြုပြင်ပေးသလိုပဲ၊ ကြွက်သားမျှင်တွေ ဆုတ်ပြဲသွားတဲ့ ဒဏ်ရာတွေကို အိပ်ချိန်အတွင်းမှာ ပြန်ဖြိုခွဲပြီး ကြွက်သားမျှင်အသစ်တွေ ပြန်ဖြည့်ရင်း ကုစားပေးရပါတယ်။ အိပ်ချိန်အတွင်းမှာ လေ့ကျင့်ခန်းဒဏ်ကြောင့် ကြွက်သားအတွင်းက ရောင်ရမ်းနာကျင်တဲ့ ဒဏ်ရာကို သက်သာသွားစေသလို အရောင်ကျအောင်လည်း ကူညီပေးနိုင်ပါတယ်။
အိပ်ချိန်နဲ့ ပတ်သက်လာရင် ပုံမှန်ညအိပ်ချိန် ၇ နာရီရှိသူတစ်ယောက်ဟာ လေ့ကျင့်ခန်းကြောင့် ကြွက်သားနာကျင်ပြီးနောက် ၈-၉ နာရီအိပ်စက်အနားယူပေးသင့်ပါတယ်။ ဒီအိပ်ချိန်ကို ညအိပ်ချိန်တစ်ခုတည်းနဲ့ တိုင်းတာမှာဖြစ်ပြီး နေ့လယ်ဘက် တစ်ရေးတစ်မော မှေးအိပ်တာကိုတော့ အိပ်ချိန်အဖြစ် ထည့်မပေါင်းပါဘူး။
၂။ အစာအာဟာရကတော့ ဒုတိယအရေးအကြီးဆုံးပါ။ လူတစ်ယောက်ရဲ့ ခန္ဓာကိုယ်က ကျန်းမာနေဖို့နဲ့ ပုံမှန်အတိုင်း အလုပ်လုပ်နိုင်ဖို့ တစ်နေ့တာလိုအပ်တဲ့ အာဟာရဓာတ်တွေကို ပြည့်ဝစွာ စားသုံးပေးဖို့ လိုပါတယ်။ အထူးသဖြင့် ကြွက်သားတွေ ဒဏ်ဖြစ်သွားလို့ အနားယူနေတဲ့အချိန်မျိုးမှာ ကြွက်သားအမျှင်အသစ်တွေ မြန်မြန်ထွက်လာဖို့နဲ့ နာကျင်မှုဒဏ်ကို သက်သာစေဖို့ အာဟာရဓာတ်တွေက တစ်ထောင့်တစ်နေရာကနေ အားဖြည့် ကူညီပေးရပါတယ်။
ကြွက်သားတွေကို ကုသပေးတဲ့နေရာမှာ အဓိက ကူညီပေးတဲ့ အာဟာရဓာတ်တွေကတော့
- ပရိုတင်းဓာတ်၊ အသားဓာတ် - ကြွက်သားအမျှင်အသစ်တွေ မြန်မြန်ထွက်လာစေပြီး ကြွက်သားထုတက်မြန်စေတယ်
- ကစီဓာတ် - တစ်နေ့တာအတွက် ပင်ပန်းနွမ်းနယ်တာတွေကို သက်သာစေပြီး နာကျင်ကိုက်ခဲမှုဝေဒနာကို လျော့ပါးစေတယ်
- ကျန်းမာတဲ့ အဆီဓာတ် - ကြွက်သားနာကျင်မှုဒဏ်ကို သက်သာစေတယ်
- ဗီတာမင်နဲ့ သတ္တုဓာတ်များ - ခန္ဓာကိုယ်တွင်း ပုံမှန်အတိုင်းအလုပ်လုပ်အောင် ထိန်းညှိပေးသလို ဆုတ်ပြဲသွားတဲ့ ကြွက်သားအမျှင်တွေကို ကုစားပေးတဲ့နေရာမှာလည်း ကူညီပေးပါတယ်
- Vitamin C - နာကျင်မှုဒဏ်ကြောင့် ကိုယ်ခံအားမကျသွားအောင် အားဖြည့်ပေးပါတယ်
ဒီအချက် (၂) ချက်ဟာ ကြွက်သားတွေကို ကောင်းစွာအနားရစေတဲ့ မဖြစ်မနေလုပ်ပေးရမယ့် အချက်တွေဖြစ်ပြီး၊ အထူးသဖြင့် အလေးပိုမရတဲ့ ယောက်ျားလေးတွေ၊ လေ့ကျင့်ခန်းမလုပ်တာကြာတော့မှ ပြန်လုပ်လိုက်လို့ နာကျင်ကိုက်ခဲနေသူတွေ ပိုပြီး ဂရုစိုက်ပေးသင့်ပါတယ်။
ကြွက်သားနာကျင်ကိုက်ခဲနေချိန်မှာ တချို့တွေကတော့ အနာခံပြီး လေ့ကျင့်ခန်းပြန်လုပ်တတ်ကြပေမယ့် တတ်နိုင်သလောက် မလုပ်တာ အကောင်းဆုံးပါပဲ။ တချို့ ပြင်းထန်တဲ့အခြေအနေတွေမှာ Overtraining Syndrome (OTS) လို့ခေါ်တဲ့ လေ့ကျင့်ခန်းအလွန်အကျွံလုပ်ခြင်းကြောင့် နောက်ဆက်တွဲဒဏ် ဖြစ်သွားနိုင်ပါတယ်။ ဒီကျန်းမာရေးအခြေအနေဟာ ကိုယ်ခံအားစနစ်ကို ထိခိုက်စေသလို အရိုးအဆစ်နဲ့ ကြွက်သားတွေကို ယာယီ ဒါမှမဟုတ် ရာသက်ပန် ထိခိုက်ချို့ယွင်းသွားစေနိုင်ပါတယ်။ ကြွက်သားရောင်နေတုန်း လေ့ကျင့်ခန်းလုပ်တာ မရပ်ထားတဲ့အခါမှာ ရောင်ရမ်းနာကျင်တဲ့ဒဏ် ပိုဆိုးသွားပြီး သက်သာဖို့ယူရတဲ့အချိန်လည်း ပိုများသွားနိုင်တာကြောင့် သတိတော့ ပြုသင့်ပါတယ်။
အကောင်းဆုံးအကြံပေးရမယ်ဆိုရင်
အခုမှ စပြီး လေ့ကျင့်ခန်းလုပ်မယ့်သူများ၊ ဒါမှမဟုတ် မလုပ်တာကြာပြီးမှ Gym ပြန်ဆော့သူများ
- အစပိုင်းမှာ ဖြည်းဖြည်းချင်းပဲ လုပ်ပါ။
- ပေါ့ပါးတဲ့ လေ့ကျင့်ခန်းမျိုးကို အဓိကထားလုပ်ပေးပါ။
- ကြွက်သားတွေကို လေ့ကျင့်ခန်းပုံမှန်လုပ်ပေးရတဲ့ အခြေအနေနဲ့ ကျင့်သားရအောင် ပြန်စပါ။
- နာကျင်ကိုက်ခဲနေစဉ်မှာ ရေများများသောက်ပါ၊ ကြွက်သားတွေကို အနားပေးပါ။
- အိပ်ချိန်များများယူပါ။
- တတ်နိုင်သလောက် လေ့ကျင့်ခန်းလုပ်တာကို အနားပေးပါ။ ပုံမှန်အားဖြင့် ၁-၂ ရက်လောက် အနားပြန်ပေးရင် လုံလောက်ပါတယ်။
ရေးသားသူ - ဒေါက်တာ ရဲမျိုးမြတ်